He Pātaka Kupu

2. [Rongo] ing .
Ētahi mea kua herea tahitia, kua pōkai tahitia, kua takaia tahitia rānei. Ka whakanōhia ngā pū nūpepa ki te taha tonu o ngā ipu rāpihi hei tiki mā te Kaunihera. (W.300)
paihere (2)

3. [Tāne] ing .
Ētahi mea kua herea tahitia, e puritia tahitia ana, e tupu tahi ana rānei. Ko te utu o te pūhā i te mākete, e whā tāra mō te pū kotahi. Tēnā koa homai he pū karepe hei kai mākū.
pūtoi (2)

pūkākano [Tāne] ing .
He hua kei reira e puritia ana ngā kākano o ētahi rākau, ētahi tipu rānei, kia pakari kua kōwhā ki te tuku i ngā kākano. Kia kōwhā te pūkākano o te karo kura ka kite koe i ngā kākano pango e noho mai ana i roto.

4. [Tāne] ing .
He huinga rākau, pātītī, aha atu e piri tahi ana, e tupu tahi ana. Ka tango ki te pū wīwī, ka rere iho taua wahine nei ki roto ki te kōruarua. (W 300)
pā ⁴ (1)

5. [Papatūānuku] ing .
Ētahi mea kua whakawhāitihia mai ki tētahi wāhi kia puke iti te noho mai. Kei te huna te kiore ki te pū paukena rā. (W.300)
haupū (3)

6. [Papatūānuku] ing .
Ētahi mea kua āta whakatakotoria kia noho mai tētahi ki runga i tētahi. Tangohia kia kotahi te kāri mai i te pū kāri, ka porowhiu ai i tētahi. { whakapū ¹ (5 ) }

7. [Tāne] ing .
He tangata pūkenga, he mātau, he mōhio ki te mea tika, ki te mahi tika. Mō te tāne anake. Nō te matenga o ana kuia, koroua ka noho ko ia te whītiki o te kī, ko ia te pū. { ruānuku , wānanga }

8. [Tangaroa] ing .
He momo wheke nō tai hōhonu. Argonauta nodosa
ngū (2)

9. [Tāne] āhua .
E rua whakaraunga te nui ake, e piri tahi ana rānei (ētahi mea e rua). Tekau pū ngā tāngata i runga i te pahi, arā, e rua tekau katoa He pepa pū taua puka, ko ngā tuhituhi ka tāia ki te pepa o runga ka tāruatia ki tō raro.

10. -nga [Papatūānuku] mahp, ing, āhua .
Kua noho puke iti mai ki tētahi wāhi. Ka pū te ruha, ka hao te rangatahi. (W 300)
haupū (2)

11. -ia -ria -nga -ranga [Tūmatauenga] mahw, ing, āhua .
Ka takatakai (i ētahi mea) kia noho pū mai. Pūia ngā raupō mō te whare. (W 300) Ka mate taua patunga ka pūria ngā tāngata. (W 300)
paihere (1)

pū²

1. -hia -nga [Tāwhirimātea] mahp, ing, āhua .
Ka pupuhi kia ngāwari noa, kia māmā noa (o te hau). Nō te hau koe e pū mai nei ki taku kiri? (W 300)
hehengi

2. [Tāne] ing .
He hanga roa, he whāiti, he rite te hanga o te nuinga ki te rango engari he ipuipu a roto, ko tāna he kawe i te wai, i te hau, i te aha atu. Me kaha tonu te pū kawe i te penehīni ki te pūkaha o te waka. Ko tā te pū i te ihu o te tūroro, he kawe hāora ki ana pūkahukahu. { ngongo ¹ (9 ) }

3. [Tūmatauenga] ing .
He rākau whakamate whai arahāmoa e pūhia atu ai te matā me te kariri. Te pakūnga o tana pū kīhai i mate ngā kuaka. (KNT 3, 4) He mea rongo mai nā tētahi tangata e pakū ana ngā pū, ka haere mai me tana pū. (HTK 1, 23) { rākau }

pū hoata [Tūmatauenga] ing .
He momo pū ka whakawhana i te tini matā ririki i te puhinga kotahi, engari kāore e pupuhi ki tawhiti rawa. Ka huihui rātou, ka whakatakoto i ā rātou kaupapa ki te ono kai, ki te tapahi harakeke, ki te topetope rākau, hei hoko atu ki te Pākehā kia riro mai ai he pū hoata. (TTR 1, 91) { (pū hōta ) }

pū hōta [Tūmatauenga] ing .
He momo pū ka whakawhana i te tini matā ririki i te puhinga kotahi, engari kāore e pupuhi ki tawhiti rawa. Kāore i mōhiotia e whia i taotū, engari e maharatia ana, he nui, i te mea he pū hōta ā ētahi. (HTK 1, 21)
(pū hoata)

pū hurihuri [Tūmatauenga] ing .
He pū poto te ara matā, he pū ka puritia ki te ringa kotahi. Ko ā mātau pū, ko ngā mea pakupaku e huaina ana he pū hurihuri. (HP 133) Ko tōna ringaringa katau i runga i tōna uma, ā, i roto i tētahi o ōna ringa e mau ana te pū hurihuri, e ono ngā māngai o te pū, kotahi te māngai kāore he kai. (PH 1, 17)

pū kurutē [Tūmatauenga] ing .
He pū ka whakawhana i te matā ki te hau pineke.

pū mīhini [Tūmatauenga] ing .
He pū ka pupuhi tonu ki te mau tonu te keunga o te keu. Ka tīmata tana haere kōnihi ki te tikitiki i ētahi o ngā Pākehā kua hinga rā, e riringi mai nei te matā o ngā pū mīhini me ngā raiwhara a Te Taake, kāore ia i aro ake. (Ko 29, wh6) { (pū tiripapā ) }

pū repo [Tūmatauenga] ing .
He pū tino nui, he taimaha, he whai wīra ētahi, ko ētahi ka whakanōhia ki tōna anō tūāpapa. Kātahi ka mauria mai he pū repo, ka taiparatia te pā, ka horo. (TTR 1, 383) { repo }

pū tiripapā [Tūmatauenga] ing .
He pū ka pupuhi tonu ki te mau tonu te keunga o te keu. Ko te mea i wehi nui ai ngā hōia o Aotearoa i tērā pakanga ko ngā pū tiripapā a te hoariri i runga i ngā pari.
(pū mīhini)

4. [Rongo] ing .
He taonga puoro ka whakatangihia mā te pupuhi whakaroto, whakapae rānei i te ngutu, me te āta pokipoki anō ngā wenewene . He moemoeā nāku ko Rua e whakatangi ana i ana pū i tēnei pō. (N 65)

pū³

1. -hia -nga [Tāne] mahp, ing, āhua, tūkē .
Ka tīmata mai, ka takea mai. Kauwhautia mai te kauwhau o te kino, i pū ai te riri, i mau ai te pakanga. (W 300) Me ka uhi rānei koe ki te huruhuru kākāpō, pū mai i te tonga. (W 300)

2. [Ranginui & Papatūānuku] ing .
Te wāhi, te tangata, te hanga rānei i tīmata mai ai, i ara ake ai tētahi mea. Ko Hawaiki ko te pū o ngā mea katoa, ko te kupu tēnei, 'Te pū kei Hawaiki, te puna kei Rangiriri' (W 300)
pūtake (3)

3. [Tāne] ing .
Te wāhanga o te tipu kei roto i te whenua e tupu ana (i te nuinga o te wā), e tautoko ana i te tipu, e tango wai ana, e tango kai ana mai i te oneone. Kotia te pū, waiho i konā, kotia te kāuru, waiho i konā. (W 300) Kia kaua e tata rawa tō kāheru ki te kakau, kei kotia te pū. { pūhaka , pūhanga ² , pūtake , rarau , take , tāmore }

4. [Papatūānuku] ing .
Te wāhanga whakararo rawa (o tētahi mea). Ki te hoatu he raima ki te pū o te taiepa, e kore rawa e taea te ueue.
pūtake (1)

5. [Tāne] ing .
A waenganui rawa o tētahi mea, te wāhi kei waenganui rawa o tētahi mea. I te wā potapotae o 1873, ka heria e Hote rāua ko Taingākawa tō rāua hapori o Ngāti Hauā ki Te Kūiti noho ai. I taua wā hoki i reira te pū o te Kīngitanga. (TTR 3, 237) Ko Waitōtara te pū o te wheke i torona ai ōna kawekawe ki tai, ki ngā rohe o Te Ihonga, ka whati atu ki roto o te awa o Pātea ki uta. (B 93) Kāore e rerekē te tawhiti mai o te paenga i te pū, huri katoa i te porohita. { pokapū , puku ¹ (5 ) , pūtahi }

6. [Tāne] ing .
He tohu ka tuhia hei whakaatu i tētahi oro o tētahi reo. E hia ngā pū o te reo Pākehā kāore e rangona ana i te reo Māori? Ko ngā kupu ko te 'a' te pū tuatahi, kei te tīmatanga o taua papakupu, ko ērā ka tīmata ki te 'wh', kei muri rawa. { reta }

7. -tia [Ranginui & Papatūānuku] tūkē .
Me te kawe (i tētahi mahi) ki tētahi taumata teitei, me te eke (o tētahi āhuatanga) ki tētahi taumata teitei. He atua nui pū a Hine. (W 300) Kua poroa pūtia te waewae, kua pororere. I wakaaetia pūtia anō ēnei kupu katoa e te huihuinga. (KNT 1, 12)

pū⁴

-nga [Whiro] mahp, ing, āhua .
Ka kaha tonu, ka mau tonu te ngākau kino, te whakaaro kino (ki tētahi atu). E pū tonu ana ki tana teina, nāna nei ia i whakaatu ki ō rāua mātua. Pū ana a roto, kē ana a waho. (W 301)
mauāhara (1)

pū⁵

[Tāne] ing .
He kete pūputu ka whakawiria hei kotē mai i te hinu o te tītoki. Te pū he mea raranga, ka opehia a roto ki te tītoki, na ka patokia, na ka marū, na ka taona, heoi ka whakawiria, ā ka heke te hinu. (W 301)
kopa ¹ (5) (kopa whakawiri tītoki)

pū⁶

ing .
He ingoa whānui mō ētahi momo kete me ētahi momo tāiki hoki.